როგორ ავარჩიოთ გენერატორი?

17 თებ. 2016

 გენერატორის არჩევისას მთავარი გასათვალისწინებელი ფაქტორია სიმძლავრე. რამდენ ვატს მოიხმარს ელექტრო ტექნიკა და განათება, რომელმაც გენერატორზე უნდა იმუშაოს, ეს არის პირველ რიგში დასათვლელი.

აქვე ისიც უნდა გავითვალისწინოთ, რომ დენის ძრავები სტარტის მომენტისას, ნომინალურზე, საშუალოდ სამჯერ მეტ სიმძლავრეს მოითხოვენ. მაგალითდ, თუ გვაქვს ბურღი, რომლის სიმძლავრეა 500 ვატი, მისი ჩართვისთვის დაგვჭირდება 1500 ვატამდე ენერგია. მას შემდეგ რაც დავაჯამებთ საჭირო ვატების რაოდენობას, უკვე შესაბამისი გენერატორის შერჩევის დროა.

თუ ამ სფეროში საკმარისად გათვიცნობიერებული არ ხართ, აუცილებლად გაგიჩნდებათ კითხვა , რა არის კვა Kva ? კილოვატი იწერება შემოკლებით კვტ (kw) და მაშინ რა არის მართლაც კვა? Kva ესაა 1000 VA , ანუ ვოლტისა და ამპერის ნამრავლი. ასე ვიღებთ ნომინალურ ვატს, ანუ ნომინალურად რამდენ ვატს გამოიმუშავებს გენერატორი. თუმცა ნომინალურსა და რეალურს შორის არსებობს განსხვავება, რადგანაც დენის სიმძლავრის ნაწილი გადაცემის დროს იკარგება. ესაა დაახლოებით 20%. გენერატორების უმრავლესობას, მახასიათებლებში, უწერია კოეფიციენტი 0,8, რასაც ძალის ფაქტორი ეწოდება და აღნიშნულია cos phi -თ. კვა-ს თუ გავამრავლებთ ძალის ფაქტორზე მივიღებთ კილოვატებს. მაგალითად, თუ გენერატორს აწერია 100 კვა, ეს ნიშნავს რომ ის გამოიმუშავებს 80 კილოვატ სიმძლავრეს.

მას შემდეგ რაც გავარკვევთ რა სიმძლავრის გენერატორი დაგვჭირდება, უნდა ავარჩიოთ გენერატორის ტიპი.

საწვავი - არსებობს დიზელზე, ბენზინზე და ბუნებრივ აირზე მომუშავე გენერატორები. გაზის გენერატორი ყველაზე ეკონომიურია, თუმცა ნაკლებად გავრცელებულია და საკმაოდ ძვირიც ღირს. მაღალი სიმძლავრის გენერატორების უმრავლესობა დიზელზე მუშაობს.

სტარტი - გენერატორი შეიძლება იყოს მექანიკურ სტარტზე (თოკით) ან ელექტრო სტარტზე, აკუმულატორის საშუალებით.

კამერა - გენერატორი შეიძლება იყოს ხმის დამხშობი კამერით ან მის გარეშე. ხმის დამხშობი კამერა გენერატორის ფასს აძვირებს, თუმცა აუცილებელია ხშირ შემთხვევაში.

ძრავის ბრუნვის სიჩქარე - ზოგ შემთხვევაში ბრუნვის სიჩქარესაც აქცევენ ყურადღებას, კონკრეტული მიზნებიდან გამომდინარე. რაც უფრო სწრაფად ბრუნავს ძრავი მით უფრო მცირე სამუშაო რესურსი აქვს.

ქართულ ბაზარზე ძირითადად ვხვდებით თურქეთში ან ჩინეთში წარმოებულ გენერატორებს. გენერატორების ბრენდებს შორის ხარისხის კუთხით საკმაოდ მნიშვნელოვანი სხვაობაა. ხარისხზე დაზოგილი თანხა ხშირ შემთხვევაში გაცილებით მეტ დანახარჯს ნიშნავს.ამიტომ, ხარისხის გათვალისწინება აუცილებელია.

სხვა სიახლეები

07

თებ

---

2017

იატაკის გათბობის შესახებ

01

ნოე

---

2016

კონდენსაციური ქვაბის ტექნოლოგია და უპირატესობები

01

ნოე

---

2016

Master-ის ინდუსტრიული დანიშნულების გამათბობლები