როგორ ავარჩიოთ კონდიციონერი

20 მაი. 2016

ზაფხული მოდის და კონდიციონერის საკითხი სულ უფრო აქტუალური ხდება. ყოველ ზაფხულს ბაზარზე ახალი ბრენდები ჩნდებიან და სულ უფრო ჭირს არჩევანის გაკეთება. თითქოს მახასიათებლები ერთნაირია, მაგრამ ფასები საგრძნობლად განსხვავდება. ამ სტატიაში შევეცდებით აგიხსნათ, თუ რას მიაქციოთ ყურადღება კონდიცონერის არჩევისას.

კონდიციონერის სიმძლავრე

ესაა მთავარი მახასიათებელი რასაც ყურადღება უნდა მიაქციოთ. სიმძლავრე შეიძლება ეწეროს BTU-ებში ან კილოვატებში. უფრო ხშირად BTU იხმარება, რაც იშიფრება როგორც British Thermal Unit (ბრიტანული თერმული ერთეული). ბაზარზე ძირითადად გვხვდება 9000, 12000, 18000, 24000 და 48000 BTU. ეს ციფრები დამრგვალებულია, რადგანაც მოდელების მიხედვით ინდივიდუალურია და ზუსტად ამ ფიცრებზე ვერც ერთის სიმძლავრე ვერ ფიქსირდება. ასეთი დაყოფა არჩევანის გასაადვილებლადაა. ამ ბმულზე შეგიძლიათ გადაიყვანოთ კილოვატები BTU-ებში და პირიქით. 

ახლა ჩნდება კითხვა, რამდენი BTU გჭირდებათ თქვენი სახლის გასაგრილებლად. აქ ბევრი ფაქტორია გასათვალისწინებელი: ფართობი, ფანჯრების რაოდენობა, საიდან ამოდის მზე, როგორი თბო იზოლაცია აქვს თქვენს სახლს, რა ტექნიკას ხმარობთ ოთახში, როგორი და რამდენი ნათურა გიყენიათ, რამდენია გარემოს ტემპერატურა, რამდენი ადამიანი იმყოფება ოთახში და კიდევ რამდენიმე დეტალი. თუ ასე დაწვრილებით გინდათ გააკეთოთ გათვლები Toshiba-ს ეს პროგრამა დაგეხმარებათ. გადმოწერეთ და შემდეგ მარტივად დაიანგარიშებთ.

უფრო მარტივად რომ მივუდგეთ საკითხს, 15-25 მ2-ს ფართობს 9000 BTU ყოფნის, 25-35-ს  - 12000, 35-50-ს - 18000, 50-70-ს 24000 ეყოფა. თუმცა, ეს საკმაოდ უხეში ვარაუდია და ჯობია თქვენი ბინის მახასიათებლებიც გაითვალისწინოთ.

ეკონომიურობა

კონდიციონერის შეძენისას ერთ-ერთი მნიშვნელოვანი ფაქტორი ეკონომიურობაა. როდესაც მახასიათებლებს გადახედავთ, დაინახავთ ენერგო ეფექტურობის კლასს A, B , C და ეფექტურობის კოეფიციენტებს EER და COP.  EER ესაა გაგრილებისას წარმოქმნილი BTU-სა და მოხმარებული ენერგიის ფარდობა. იგივეა COP გათბობის შემთხვევაში. სწორედ ამ ორი კოეფიციენტიდან დგინდება ეფექტურობის კლასი. ეს უკანასკნელი ორი მახასიათებლით უნდა აღინიშნოს (მაგ. A/B). პირველი გაგრილების ეფექტურობაა, მეორე გათბობის. 

გაგრილების A დონეს მხოლოდ ინვერტორული კონდიციონერები აღწევენ. მათი ეკონომიურობის გამო ფასიც საგრძნობლად მაღალია, დაახლოებით ორჯერ ძვირი მცირე სიმძლავრის მოდელების შემთხვევაში. ეფექტურობის A მარკა გაგრილების შემთხვევაში 3,2 EER-დან იწყება.

არ მოტყუვდეთ! თუ გადახედავთ ქართულ ბაზარზე არსებულ ბრენდებს , უმეტესობას EER 3.21 უწერია, თითქოს ერთ დონეზე სპეციალურად დააყენეს მწარმოებლებმა. სინამდვილეში მონაცემები გაყალბებულია და 3,21 მხოლოდ იმიტომ წერია, რომ ეფექტურბის A კლასი მიუწერონ. შემოწმების მარტივი გზა არსებობს. დააკოპირეთ კონდიციონერის მოდელი და გუგლში მოძებნეთ. აღმოაჩენთ რომ იგივე მოდელს უცხოურ საიტებზე 3,21-ის ნაცვლად, 2,8 ან ნაკლები EER უწერია. მეორე შემთხვევაში გუგლში მსგავს ბრენდს საერთოდ ვერ იპოვით. ეს ნიშნავს, რომ ქართველმა დილერმა კონდიციონერი ჩინეთში შეუკვეთა, თვითონ დაბრენდა და რაც უნდოდა ის მიაწერა.

ახლა დავითვალოთ თუ რა ეკონომიას გვაძლევს EER-ის ცვლილება. თუ დავუშვებთ, რომ კონდიციონერი ზაფხულში სამი თვის განმავლობაში გაქვთ ჩართული დღეში 10 საათით 0,1 -ით EER-ის გაზრდა სეზონზე 5 ლარის ეკონომიას მოგცემთ.

ბრენდები და ხარისხი

ბაზარზე ათობით დასახელების ბრენდია, თუმცა ყიდვის გადაწყვეტილების მიღებამდე ჯობია ბრენდს კარგად გაეცნოთ. თუ ორ ბრენდს აქვს ერთნაირი გარანტია, არ იფიქროთ, რომ ორივე ერთნაირი ხარისხისაა. მუშაობა და მუშაობა მახასიათებლების შესაბამისად სხვადასხვა რამეა. როგორც უკვე აღვნიშნეთ, შესაძლოა გადაჭარბებით იყოს მოცემული BTU და EER. ეს კი ნიშნავს, რომ თქვენი კონდიციონერი , რომლის სიმძლავრე ზუსტად აარჩიეთ, ოთახს ვერ გააგრილებს შესაბამისად. მხოლოდ გაგრილებაც არაა საკმარისი, აუცილებელია ჰქონდეს ხარისხიანი ფილტრები, ეფექტური მუშაობის რეჟიმები, რაც დამატებითი კომფორტი და დანაზოგია. ასე რომ, არ მოტყუვდეთ ბრენდის სახელებით, კონდიციონერის დაბრენდვა ძალიან მარტივია, მომწოდებლები ყიდულობენ კონდიციონერს და ბრენდავენ იმ სახელით რაც ყურს ლამაზად მოხვდება. ენდეთ მხოლოდ გამოცდილ, საერთაშორისო ბრენდებს.

ფილტრები, მუშაობის რეჟიმები, მონტაჟი

არსებობს იონიზატორი ფილტრები, ოქროს ფილტრები, კარბონის ფილტრები და მრავალი სხვა. თქვენზეა დამოკიდებული რომელს შეარჩევთ.

რაც უფრო დახვეწილია კონდიციონერი, მით უფრო ეფექტური მუშაობის რეჟიმების არჩევის შესაძლებლობა აქვს. მაგალითად, ღამის რეჟიმი, უხმაურო რეჟიმი, ოთახში ადამიანების შემჩნევის შესაძლებლობა, ტემპერატურის რეგულირება დამატებით თერმოსტატით და სხვა.

კონდიციონერის არჩევისას ყურადღება უნდა მიაქციოთ, მოყვება თუ არა მას მონტაჟისთვის საჭირო დეტალები. მაგალითად, ბევრ კონდიციონერს არ მოყვება სპილენძის მილი, რაც დამატებითი ჯარხია.

მონტაჟი ბაზარზე საშუალოდ 100 ლარი ღირს. ამ ფასში უნდა შევიდეს გარე ბლოკის საკიდი და მონტაჟისთის საჭირო სხვა მასალები.

ბოლოს, რჩევის სახით რეკომენდაციას Carrier-ის ბრენდს გავუწევთ. ვერ გეტყვით, რომ ეს რეკომენდაცია მიუკერძოებელია, ჩვენ ვართ Carrier-ის იმპორტიორები, თუმცა ბრენდის ხარისხში თავადაც შეგიძლიათ დარწმუნდეთ. მოძებნეთ ინტერნეტში ინფორმაცია Carrier-ის შესახებ და ნახავთ, რომ ესაა მსოფლიოში პირველი ჰაერის კონდიციონერის შემქმნელი კომპანია, რომელიც მსოფლიო ლიდერია 1902 წლიდან კონდიციონერების წარმოებაში.

www.carrier.com.ge

სხვა სიახლეები

07

თებ

---

2017

იატაკის გათბობის შესახებ

01

ნოე

---

2016

კონდენსაციური ქვაბის ტექნოლოგია და უპირატესობები

01

ნოე

---

2016

Master-ის ინდუსტრიული დანიშნულების გამათბობლები